ساعات

انا ساعات امددني في الفورمالين

وادفن دماغي في الردة اياك تلين

اهادن واطبطب وانتشي وافوق

القاني خسران والكلاب كسبانين

.

انا ساعات امددني في الفورمالين

واعمل وداني من طين ومن عجين

واقول بكرة الزمان يقول كلمته

يا فرحتي بيك لما من بعدي تحين

.

انا ساعات امددني في الفورمالين

واقول الكلام هيلاقي له سامعين

يا ولادنا ما بخلنا عليكو بالحلم

وغيرنا الحلم في شرعه سب دين

.
آي والله سب دين
.

بيني وبينك دم

قال نفتح صفحة جديدة وننسى اللي فات

دا احنا يدوب عرفنا فرق النطق من السكات

لو غيري صالح، انا تاري صاحي

بيني وبينك دم اخويا وصاحبي اللي مات

.

النُقَط

غرسنا النُقَط وسبنا القدر يرويها

يرسمها سكة وطريق لاجل نمشيها

لاجل العيون السود
لاجل تلاقيني والاقيها
.

عيون حبيبي عطشي ورواي

عيون حبيبي ضلة ونسمة وناي

واحة هنا وراحة بال
صبرت يا اخوانّا
ومن صبر نال

.

الحائط

الشبر ونص جُم سألوه ايه جواه

شبّ لفوق، بص بعيـــــــــــــــــــــــــــد وقال ما رآه

ضحكوا عليه ورجعوا لحالهم

قام باني الحيط وقوام علّاه

.