Sunday, May 22, 2011

ساعات

انا ساعات امددني في الفورمالين
وادفن دماغي في الردة اياك تلين
اهادن واطبطب وانتشي وافوق
القاني خسران والكلاب كسبانين
.
انا ساعات امددني في الفورمالين
واعمل وداني من طين ومن عجين
واقول بكرة الزمان يقول كلمته
يا فرحتي بيك لما من بعدي تحين
.
انا ساعات امددني في الفورمالين
واقول الكلام هيلاقي له سامعين
يا ولادنا ما بخلنا عليكو بالحلم
وغيرنا الحلم في شرعه سب دين
.
آي والله سب دين
.

Friday, May 20, 2011

بيني وبينك دم

قال نفتح صفحة جديدة وننسى اللي فات
دا احنا يدوب عرفنا فرق النطق من السكات
لو غيري صالح، انا تاري صاحي
بيني وبينك دم اخويا وصاحبي اللي مات
.

Wednesday, May 4, 2011

النُقَط

غرسنا النُقَط وسبنا القدر يرويها
يرسمها سكة وطريق لاجل نمشيها
لاجل العيون السود
لاجل تلاقيني والاقيها
.
عيون حبيبي عطشي ورواي
عيون حبيبي ضلة ونسمة وناي
واحة هنا وراحة بال
صبرت يا اخوانّا
ومن صبر نال
.

Monday, May 2, 2011

الحائط

الشبر ونص جُم سألوه ايه جواه
شبّ لفوق، بص بعيـــــــــــــــــــــــــــد وقال ما رآه
ضحكوا عليه ورجعوا لحالهم
قام باني الحيط وقوام علّاه
.