رسمي العاجز

الراجل دا وشه فكّرني بعم "رسمي العاجز"، كانوا بينادوه كدة في البلد. بس رسمي العاجز عيونة اكثر حجوظا وأنفه اكبر بكتييييير

كان دايما ييجي يشحت في بلدنا - عرفت انه من القرية اللي جنبنا وانا كبير - ودايما راكب على ظهر حمارته. ورجليه محطوطين في شوالين على جانبي الحمارة. طول عمري كان الفضول بياكلني اعرف ايه جوه الشوالين

وفي مرة لقيته قاعد على عتبة أبونا بولس، واندهشت، دا نزل ازاي؟ وازاي هيطلع؟ وفضلت واقف لحد ما طلع ابونا وساعتها اندهشت من الشبه اللي بينهم

مع الأيام زاد الشبه بينهم جدا - في مخيلتي - لدرجة ان الواحد منهم كان بيفكرني بالتاني وكنت بقول بثقة انهم قرايب قبل ما اعرف ان رسمي مش من بلدنا

الاتنين ملفوفين بالغموض. لما كان حد من البلد جاموسته مترضاش تحلب، كان بيروح لابونا بولس يكتبلها حجاب. الموضوع دا خلاني افهم ازاي حمارة رسمي بتسمع كلامه. كان عندي اعتقاد ان الوتد الملفوف حوالين رقبتها بحبل ليف مش اكتر من حجاب للطاعة

وتروح أيام وتيجي أيام واخد بالي من وجه أعظم للشبه؛ الأتنين كانوا عايشين  وفاتحين بيوتهم من شقا غيرهم

.
سفر الطفيليات، الاصحاح الخامس
.