مما اتذكر

في درس طقوس:
أبونا يسى: عارفين ياولاد ليه بنحط بيضة نعامة قدام الهيكل؟
حد من القاعدين: يمكن علشان أكبر بيضة يا أبونا.
أبونا يسى: يا سلام يا أخي ما بيضة الفيل أكبر.

على فكرة الراجل دا طيب ومكانش يقصد اي حاجة من اللي بالكم فيها

في ندوة دينية:
كان واحد مطران هيوعظنا عن ايمان مريم ومرثا اخوات لعازر، وكنا نيجي سبعين ولد وبنت ومن ضمن الحضور كانت بنوتة جميلة جدا اسمها "ايمان مجدي":
المطران الأنبا قزعة: ياسلام، ايهما اجمل، ايمان مريم أم ايمان مرثا؟
واحدة من البنات: ايمان مجدي يا سيدنا

بوظت عليه الجو الروحي التأملي العميق، وساد الهرج والمرج


زمان كانت هبت حريقة وسط الغيطان، وحريم البلد طلعوا يجروا اللي في ايدها جردل، واللي على راسها حلة وبيصرخوا يا عدرا... يا عدار.. يا ام النور.
عدوا على راجل كبير وهما بيقولوا يا عدرا قام قال لهن:
خي*؛ راح تنزل العدرا تصمد ايديها دلوقتي، شالله منطفت النار
.
خي* دي كلمة استنكار بحسب سلو بلدنا
.

هي: عملت ايه في امتحان النهاردة؟
هو: محليتش يا ماما.
هي: ليه كده؟ دا انا حتي مولعالك شمعة قبل الإمتحان.
هو: آه مولعالي شمعة، ولعتيها لمين يا ماما؟
هي: ولعتها للبابا كيرلس ومار جرجس ومار مينا و......
هو: ستووووووب، مية مرة اقولك ولعيها لواحد بس.
هي: ودي فيها ايه يا ابني؟
هو: مفيهاش يا ماما، اهم اتكلوا على بعض ومحدش منهم عبرني.
.